0:00
/
1ܘܗَܘܹܐ ܠܵܗ̇ ܒܚܲܕَ ܡ̣ܢ ܝܵܘܡܵܢܹ̈ܐ: ܟܲܕ ܡܵܠܘܿܦܹܐ ܗ݇ܘܵܐ ܓܵܘ ܗܲܝܟܠܵܐ ܠܛܵܝܸܦܵܐ ܘܡܲܫܚܘܼܕܹܐ: ܩܸܡܠܗَܘܿܢ ܥܲܠܘܼܗܝ ܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ ܥܲܡ ܚܘܵܪ̈ܕܸܩܢܹܐ. 2ܘܗܘܼܡܙܸܡܠܗܿܢ ܥܲܡܹܗ ܒܹܐܡܵܪܵܐ: ܐَܡܘܿܪ ܐܸܠܲܢ ܒܐܲܝܢܝܼ ܗܘܼܟܡܵܐ ܐܲܢܹܐ ܒܸܥܒ̣ܵܕܵܐ ܝܘܸܬ: ܝܲܢ ܡܵܢܝܼ ܝܠܹܗ ܗ̇ܘ ܕܝܘܼܗَܒܼܸܠܹܗ ܐܸܠܘܼܟܼ ܐܵܗܵܐ ܗܘܼܟܡܵܐ. 3ܓ̰ܘܼܘܸܒܠܹܗ ܘܐَܡܝܼܪܹܗ ܐܸܠܵܝܗܝ: ܒܸܬ ܒܵܩܪܸܢܵܘܟ̣ܘܿܢ ܐܘܼܦ ܐܵܢܵܐ ܚܕܵܐ ܗܹܡܸܙܡܵܢ: ܘܐَܡܘܿܪܘܼܢ ܠܝܼ. 4ܡܲܥܡܘܿܕܝܼܬܹܗ ܕܝܘܿܚܲܢܵܢ ܡ̣ܢ ܫܡܲܝܵܐ ܗ݇ܘܵܐ: ܝܲܢ ܡ̣ܢ ܒܢܲܝ̈ܢܵܫܵܐ. 5ܐܝܼܢܵܐ ܐܵܢܝܼ ܚܵܫܒ̣ܝܼ ܗ݇ܘܵܘ ܒܓܵܢܵܝܗܝ ܘܐܵܡܪܝܼ: ܐܸܢ ܐܵܡܪܵܚ: ܡ̣ܢ ܫܡܲܝܵܐ: ܒܸܬ ܐܵܡܸܪ ܐܸܠܲܢ: ܩܵܡܘܿܕܝܼ ܠܵܐ ܗܘܼܡܸܢܵܘܟ̣ܘܿܢ ܐܸܠܹܗ. 6ܘܐܸܢ ܐܵܡܪܵܚ: ܡ̣ܢ ܒܢܲܝ̈ܢܵܫܵܐ: ܒܸܬ ܪܵܓ̰ܸܡ ܠܲܢ ܟܠܹܗ ܛܵܝܸܦܵܐ: ܣܵܒܵܒ ܕܗܘܼܡܸܢܹܐ ܝܢܵܐ ܕܝܘܿܚܲܢܵܢ ܢܒ̣ܝܼܵܐ ܝܠܹܗ. 7ܘܓ̰ܘܼܘܸܒܠܗܘܿܢ: ܠܹܐ ܝܘܵܚ ܒܝܼܕܵܥܝܵܐ ܡܐܲܝܟܵܐ ܝ݇ܠܵܗ̇. 8ܐܵܡܸܪ ܐܸܠܵܝܗܝ ܝܼܫܘܿܥ: ܘܐܵܢܵܐ ܠܹܐ ܐܵܡܪܸܢܵܘܟ̣ܘܿܢ ܒܐܲܝܢܝܼ ܗܘܼܟܡܵܐ ܐܲܢܹܐ ܒܸܥܒ̣ܵܕܵܐ ܝܘܸܢ. 9ܘܫܘܼܪܹܐܠܹܗ ܕܐܵܡܸܪ ܠܛܵܝܸܦܵܐ ܐܵܗܵܐ ܡܵܣܵܠܵܐ: ܚܲܕَ ܐ݇ܢܵܫܵܐ ܢܸܨܒ̣ܠܹܗ ܟܲܪܡܵܐ: ܘܣܘܼܦܹܠܹܗ ܠܦܵܠܚܹ̈ܐ: ܘܐَܙܸܠܹܗ ܠܪܸܚܩܵܐ ܙܲܒ̣ܢܵܐ ܪܵܒܵܐ. 10ܘܒܙܲܒ̣ܢܵܐ ܫܘܼܕܸܪܹܗ ܪܹܓܹܗ ܠܟܸܣ ܦܵܠܵܚܹ̈ܐ: ܕܝܵܗَܒ̣ܝܼ ܠܹܗ ܡ̣ܢ ܛܥܘܿܢܝܵܬܹ̈ܗ ܕܟܲܪܡܵܐ: ܐܝܼܢܵܐ ܦܵܠܵܚܹ̈ܐ ܡܚܹܠܗܘܿܢ ܐܸܠܹܗ: ܘܫܘܼܕܸܪܗܘܿܢ ܐܸܠܹܗ ܣܦܝܼܩܵܐ. 11ܘܡܘܼܙܝܸܕܠܹܗ ܘܫܘܼܕܸܪܹܗ ܠܪܹܓܹܗ ܐ݇ܚܹܪ݇ܢܵܐ: ܐܝܼܢܵܐ ܐܘܼܦ ܠܗ̇ܘ ܡܚܹܠܗܘܿܢ ܘܥܒܸܕܠܗܘܿܢ ܒܹܨܘܼܪ: ܘܫܘܼܕܸܪܗܘܿܢ ܐܸܠܹܗ ܣܦܝܼܩܵܐ. 12ܘܡܘܼܙܝܸܕܠܹܗ ܘܫܘܼܕܸܪܹܗ ܕܬܠܵܬَܐ: ܐܝܼܢܵܐ ܐܘܼܦ ܠܗ̇ܘ ܡܚܹܠܗܘܿܢ ܒܪܝܼܢܕܵܪ ܘܦܘܼܠܸܛܠܗܘܿܢ ܐܸܠܹܗ. 13ܐܵܡܸܪ ܡܵܪܵܐ ܕܟܲܪܡܵܐ: ܡܘܼܕܝܼ ܥܵܒ̣ܕܸܢ: ܒܸܬ ܫܵܕܪܸܢ ܒܪܘܿܢܝܼ ܡܘܼܚܸܒܵܐ: ܩܵܘܡܵܐ ܢܵܚܦܝܼ ܡܸܢܹܗ. 14ܐܝܼܢܵܐ ܟܲܕ ܚܙܹܐܠܗܘܿܢ ܐܸܠܹܗ ܦܵܠܵܚܹ̈ܐ: ܚܵܫܒ̣ܝܼ ܗ݇ܘܵܘ ܒܓܵܢܵܝܗܝ ܘܐܵܡܪܝܼ: ܐܵܗܵܐ ܝܠܹܗ ܡܝܼܪܲܬܓܵܪ: ܩܵܛܠܵܚ ܠܹܗ: ܘܒܸܬ ܗܵܘܝܵܐ ܡܝܼܪܲܬܓܵܪܘܼܬܵܐ ܕܝܲܢ. 15ܘܦܘܼܠܸܛܠܗܘܿܢ ܐܸܠܹܗ ܠܒܲܕܲܪ ܡ̣ܢ ܟܲܪܡܵܐ: ܘܩܛܸܠܗܘܿܢ ܐܸܠܹܗ. ܡܘܼܕܝܼ ܗܲܕܟ̣ܵܐ ܒܸܬ ܥܵܒܸܕ ܠܗ݇ܘܿܢ ܡܵܪܵܐ ܕܟܲܪܡܵܐ. 16ܒܸܬ ܐܵܬܹܐ ܘܒܸܬ ܬܵܠܸܩ ܠܐܵܢܝܼ ܦܵܠܵܚܹ̈ܐ: ܘܒܸܬ ܝܵܗَܒܸܠ ܟܲܪܡܵܐ ܠܐ݇ܚܹܪ̈݇ܢܹܐ. ܐܝܼܢܵܐ ܟܲܕ ܫܡܸܥܠܗَܘܿܢ: ܐَܡܸܪܗܘܿܢ: ܐܵܗܵܐ ܠܵܐ ܗܵܘܝܵܐ. 17ܐܝܼܢܵܐ ܗ̇ܘ ܚܸܪܹܗ ܒܝܼܵܝܗܝ ܘܐَܡܝܼܪܹܗ: ܒܲܣ ܡܘܼܕܝܼ ܝ݇ܠܵܗ̇ ܗ̇ܝ ܕܝܼܠܵܗ̇ ܟܬܝܼܒ̣ܬܵܐ: ܟܹܐܦܵܐ ܕܡܘܼܣܠܹܠܗܘܿܢ ܒܲܢܹ̈ܐ: ܗ̇ܘ ܗَܘܹܐܠܹܗ ܠܪܹܫܵܐ ܕܩܸܪܢܝܼܬܵܐ. 18ܘܟܠ ܡ̇ܢ ܕܢܵܦܸܠ ܥܲܠ ܕܗ̇ܘ ܟܹܐܦܵܐ: ܒܸܬ ܦܵܐܹܫ ܛܒ̣ܝܼܚܵܐ: ܘܟܠ ܡ̇ܢ ܕܗ̇ܘ ܢܵܦܸܠ ܥܲܠܘܼܗܝ: ܒܸܬ ܕܵܪܹܐ ܠܹܗ. 19ܘܛܸܥܠܗܘܿܢ ܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ ܕܕܵܪܝܼ ܥܲܠܘܼܗܝ ܐܝܼܕܵܬܹ̈ܐ ܗܲܪ ܒܗ̇ܝ ܣܵܥܲܬ: ܘܙܕܸܥܠܗܘܿܢ ܡ̣ܢ ܛܵܝܸܦܵܐ: ܣܵܒܵܒ ܕܝܕܸܥܠܗܘܿܢ ܕܥܲܠܵܝܗܝ ܐَܡܝܼܪܹܗ ܐܵܗܵܐ ܡܵܣܵܠܵܐ. 20ܘܟܲܕ ܨܵܝܕܝܼ ܗ݇ܘܵܘ ܠܹܗ ܫܘܼܕܸܪܗܘܿܢ ܠܟܸܣܠܹܗ ܓ̰ܵܣܘܿܣܹ̈ܐ: ܡܲܕܡܘܼܝܹܐ ܓܵܢܵܝܗܝ ܠܸܗَܘܵܝܵܐ ܙܲܕܝܼܩܹ̈ܐ: ܕܕܵܒ̣ܩܝܼ ܠܹܗ ܒܗܹܡܸܙܡܵܢ: ܘܣܵܦܝܼܠܹܗ ܠܕܝܼܘܵܢ ܘܠܗܘܼܟܡܵܐ ܕܗܵܟܝܼܡ. 21ܘܒܘܼܩܸܪܗܘܿܢ ܡܸܢܹܗ ܘܐَܡܸܪܗܘܿܢ ܐܸܠܹܗ: ܡܲܠܦܵܢܵܐ: ܟܹܐ ܝܵܕܥܵܚ ܕܒܬܪܘܼܨܘܼܬܵܐ ܟܹܐ ܗܲܡܙܸܡܸܬ ܘܟܹܐ ܡܵܠܦܸܬ: ܘܠܹܐ ܫܵܩܠܸܬ ܦܵܬܵܐ: ܐܸܠܵܐ ܒܗܵܩܘܼܬܵܐ ܐܘܼܪܚܵܐ ܕܐܲܠܵܗܵܐ ܡܵܠܘܿܦܹܐ ܝܘܸܬ. 22ܒܕܲܣܬܘܼܪ ܝ݇ܠܵܗ̇ ܐܸܠܲܢ ܕܝܵܗَܒ̣ܵܚ ܚܲܪܓ̰ ܕܪܹܫܵܐ ܠܩܹܣܲܪ: ܝܲܢ ܠܵܐ. 23ܐܝܼܢܵܐ ܗ̇ܘ ܦܘܼܪܡܹܠܹܗ ܨܢܝܼܥܘܼܬܵܝܗܝ: ܘܐَܡܝܼܪܹܗ. ܡܲܚܙܹܝܡܘܿܢ ܠܝܼ ܕܝܼܢܵܪܵܐ. 24ܫܸܟܠܵܐ ܘܣܸܟܵܐ ܕܡ̇ܢ ܐܝܼܬ ܒܝܹܗ: ܘܐܵܢܝܼ ܓ̰ܘܼܘܸܒܠܘܿܢ ܘܐَܡܸܪܗܘܿܢ: ܕܩܹܣܲܪ. 25ܐܵܡܸܪ ܐܸܠܵܝܗܝ ܗ̇ܘ: ܗܲܒَܠܗܘܿܢ ܗܲܕܟ̣ܵܐ ܕܩܹܣܲܪ ܠܩܹܣܲܪ: ܘܕܲܐܠܵܗܵܐ ܠܐܲܠܵܗܵܐ. 26ܘܠܵܐ ܡܨܹܐܠܗܘܿܢ ܠܸܕܒ̣ܵܩܵܐ ܡܸܢܹܗ ܗܹܡܸܙܡܵܢ ܩܵܕَܡ ܛܵܝܸܦܵܐ: ܘܥܘܼܓ̰ܸܒܠܗܘܿܢ ܒܓ̰ܘܼܘܵܒܹܗ: ܘܫܬܸܩܠܗܘܿܢ. 27ܐܝܼܢܵܐ ܐ݇ܬܹܐܠܗܘܿܢ ܠܟܸܣܠܹܗ ܐ݇ܢܵܫܹ̈ܐ ܡ̣ܢ ܙܲܕܘܼܩܵܝܹ̈ܐ: ܐܵܢܝܼ ܕܟܹܐ ܐܵܡܪܝܼ ܕܩܝܵܡܬܵܐ ܠܲܝܬ: ܘܒܘܼܩܸܪܗܘܿܢ ܡܸܢܹܗ. 28ܘܐَܡܸܪܗܘܿܢ ܐܸܠܹܗ: ܡܲܠܦܵܢܵܐ: ܡܘܼܫܹܐ ܟܬܸܒ̣ܠܹܗ ܐܸܠܲܢ: ܕܐܸܢ ܐܵܚܘܿܢܹܗ ܕܐ݇ܢܵܫܵܐ ܡܵܝܸܬ: ܕܐܝܼܬ ܠܹܗ ܒܲܟ̣ܬܵܐ: ܘܗܵܘܹܐ ܕܠܵܐ ܒܢܘܿܢܹ̈ܐ: ܓܵܒܸܪ ܐܵܚܘܿܢܹܗ ܒܲܟ̣ܬܹܗ: ܘܡܲܩܸܡ ܙܲܪܥܵܐ ܠܐܵܚܘܿܢܹܗ. 29ܒܲܣ ܐܝܼܬ ܗ݇ܘܵܘ ܫܲܒ̣ܥܵܐ ܐܲܚܘܿܢܘܵܬܹ̈ܐ: ܘܩܵܕَܡܵܝܵܐ ܓܒܸܪܹܗ ܒܲܟ̣ܬܵܐ: ܘܡܝܼܬܠܹܗ ܕܠܵܐ ܒܢܘܿܢܹ̈ܐ. 30ܘܗ̇ܘ ܕܬܪܹܝ ܫܩܝܼܠܵܠܹܗ ܠܒܲܟ̣ܬܹܗ: ܘܐܵܗܵܐ ܡܝܼܬܠܹܗ ܕܠܵܐ ܒܢܘܿܢܹ̈ܐ. 31ܘܗ̇ܘ ܕܬܠܵܬَܐ ܫܩܝܼܠܵܠܹܗ: ܘܗܲܕܟ̣ܵܐ ܐܘܼܦ ܫܲܒܲܥܵܢܬܵܝ ܠܵܐ ܫܒܸܩܠܗܘܿܢ ܒܢܘܿܢܹ̈ܐ: ܘܡܝܼܬܠܗܘܿܢ. 32ܘܡܝܼܬܠܵܗ̇ ܒܐَܚܲܪܬܵܐ ܕܟܠܵܝܗܝ ܐܘܼܦ ܒܲܟ̣ܬܵܐ. 33ܒܩܝܵܡܬܵܐ ܗܲܕܟ̣ܵܐ ܕܐܵܝܢܝܼ ܡܸܢܵܝܗܝ ܒܸܬ ܗܵܘܝܵܐ ܒܲܟ̣ܬܵܐ: ܣܵܒܵܒ ܕܫܲܒܲܥܢܬܵܝ ܓܒ̣ܝܼܪܵܠܗܘܿܢ. 34ܘܐَܡܝܼܪܹܗ ܐܸܠܵܝܗܝ ܝܼܫܘܿܥ: ܒܢܘܿܢܹ̈ܐ ܕܐܵܗܵܐ ܥܵܠܡܵܐ ܟܹܐ ܓܵܒ̣ܪܝܼ: ܘܟܹܐ ܦܵܝܫܝܼ ܝܘܼܗَܒܹܐ ܠܓܲܒ̣ܪܹ̈ܐ. 35ܐܝܼܢܵܐ ܐܵܢܝܼ ܕܚܵܫܚܝܼ ܠܸܩܢܵܝܵܐ ܠܗ̇ܘ ܥܵܠܡܵܐ: ܘܠܩܝܵܡܬܵܐ ܡ̣ܢ ܡܝܼܬܹ̈ܐ: ܠܹܐ ܓܵܒ̣ܪܝܼ: ܐܘܼܦ ܠܹܐ ܦܵܝܫܝܼ ܝܘܼܗَܒ̣ܵܐ ܠܓܲܒ̣ܪܹ̈ܐ. 36ܣܵܒܵܒ ܐܘܼܦ ܠܵܐ ܡܸܢَܕܪܸܫَ ܠܸܡܝܵܬܵܐ ܟܹܐ ܡܵܨܝܼ: ܣܵܒܵܒ ܐܲܝܟܼ ܡܲܠܲܐܟܹ̈ܐ ܝܢܵܐ: ܘܒܢܘܿܢܹ̈ܐ ܕܐܲܠܵܗܵܐ ܝܢܵܐ: ܣܵܒܵܒ ܕܗَܘܹܐܠܗَܘܿܢ ܒܢܘܿܢܹ̈ܐ ܕܩܝܵܡܬܵܐ. 37ܐܝܼܢܵܐ ܕܩܵܝܡܝܼ ܡܝܼܬܹ̈ܐ: ܐܘܼܦ ܡܘܼܫܹܐ ܡܘܼܕܸܥܠܹܗ ܒܣܲܢܝܵܐ: ܟܲܕ ܐَܡܝܼܪܹܗ: ܡܵܪܝܵܐ ܐܵܠܵܗܹܗ ܕܐܲܒ̣ܪܵܗܵܡ ܘܐܲܠܵܗܹܗ ܕܐܝܼܣܚܵܩ ܘܐܲܠܵܗܹܗ ܕܝܲܥܩܘܿܒ̣. 38ܐܝܼܢܵܐ ܐܲܠܵܗܵܐ ܠܹܐ ܝܠܹܗ ܕܡܝܼܬܹ̈ܐ: ܐܸܠܵܐ ܕܚܵܝܹ̈ܐ: ܣܵܒܵܒ ܟܠܵܝܗܝ ܟܹܐ ܚܵܝܝܼ ܐܸܠܹܗ. 39ܘܓ̰ܘܼܘܸܒܠܗܘܿܢ ܐ݇ܢܵܫܹ̈ܐ ܡ̣ܢ ܣܵܦܪܹ̈ܐ: ܘܐَܡܸܪܗܘܿܢ ܐܸܠܹܗ: ܡܲܠܦܵܢܵܐ: ܨܦܵܝܝܼ ܒܹܐܡܵܪܵܐ ܝܘܸܬ. 40ܘܡܸܢَܕܪܸܫَ ܠܵܐ ܩܘܼܫܕܸܪܗܘܿܢ ܠܒܵܩܘܿܪܹܐ ܡܸܢܹܗ ܡܸܢܕܝܼ. 41ܘܐَܡܝܼܪܹܗ ܐܸܠܵܝܗܝ: ܕܵܐܟ̣ܝܼ ܟܹܐ ܐܵܡܪܝܼ ܕܡܫܝܼܚܵܐ ܒܪܘܿܢܹܗ ܕܕܵܘܝܼܕ ܝܼܠܹܗ. 42ܣܵܒܵܒ ܕܵܘܝܼܕ ܒܓܵܢܹܗ: ܐَܡܝܼܪܹܗ ܒܟܬܵܒ̣ܵܐ ܕܡܲܙܡܘܿܪܹ̈ܐ: ܐَܡܝܼܪܹܗ ܡܵܪܝܵܐ ܠܡܵܪܝܼ: ܝܬܘܿܒ̣ ܠܘܼܟܼ ܡ̣ܢ ܝܲܡܝܼܢܝܼ. 43ܗܲܠ ܕܡܲܬܒܸܢ ܕܸܫܡܸܢܘܼ̈ܟ ܟܘܼܒ̣ܫܵܐ ܬܚܘܿܬ ܐܲܩܠܘܼ̈ܟ. 44ܕܵܘܝܼܕ ܗܲܕܟ̣ܵܐ ܒܸܩܪܵܝܹܗ ܝܠܹܗ ܡܵܪܝܵܐ: ܘܕܵܐܟ̣ܝܼ ܒܪܘܿܢܹܗ ܝܠܹܗ. 45ܘܟܲܕ ܟܠܹܗ ܛܵܝܸܦܵܐ ܒܸܫܡܲܥܝܵܐ ܗ݇ܘܵܐ: ܐَܡܝܼܪܹܗ ܠܬܲܠܡܝܼܕܘܼ̈ܗܝ. 46ܗَܘܹܝܡܘܿܢ ܗܸܫܝܵܪ ܡ̣ܢ ܣܵܦܪܹ̈ܐ ܕܒܵܥܝܼ ܠܸܚܕܵܪܵܐ ܒܠܒܸܫܝܵܬܹ̈ܐ ܝܵܪ̈ܝܼܟܹܐ: ܘܟܹܐ ܡܲܚܸܒܝܼ ܫܠܵܡܵܐ ܒܫܘܼܩܹ̈ܐ: ܘܪܹܫܵܐ ܕܡܵܘܬܒܹ̈ܐ ܓܵܘ ܟܢܘܼܫܝܵܬܹ̈ܐ: ܘܪܹܫܵܐ ܕܝܬܝܵܒܹ̈ܐ ܒܐܲܪ̈ܚܘܼܝܵܬܹܐ. 47ܐܵܢܝܼ ܕܟܹܐ ܐܵܟ̣ܠܝܼ ܒܵܬܹ̈ܐ ܕܐܲܪ̈ܡܠܝܵܬܹܐ: ܘܒܡܵܗܵܢܵܐ ܟܹܐ ܡܲܪܝܸܟ̣ܝܼ ܨܠܵܘܵܬܵܝ̈ܗܝ. ܐܵܢܝܼ ܒܸܬ ܩܵܒܠܝܼ ܕܝܼܘܵܢ ܙܵܘܕܵܐ.